Hvenær verður landinn orðinn grænn í framan?

Maður er eiginlega að verða komin með netta ógleði eftir að hafa hlustað og fylgst með þessum græna popúlisma sem tröllríður þjóðinni þessa dagana og það vaselínlaust.

Þetta verður nú að vera innan skynsamlegra marka, þó eflaust henti þetta stjórnmálaflokkunum vel... því þeir þurfa þá ekki á meðan að svara spurningunum um hvað eigi í alvöru að gera fyrir þennan venjulega Jón sem er að kikna undan verðbólgu, vaxtaokri, himinháu vöruverði, og meingölluðu skattakerfi.

Að ekki sé minnst á öryrkjana sem í það minnsta þyrftu leiðbeiningar frá þessu liði um hvernig komast skuli af á þeim lúsarbótum sem þeir fá. Og hvað með áhyggjulausa ævikvöldið?

Fariði nú að hægja á ykkur í þessari náttúruverndarmaníu og farið að tala um fólk, venjulegt fólk sem hefur meiri áhyggjur af svolítið meira concrete hlutum.

 

Vinstri grænir kynna Græna framtíð

Athugasemdir

[Skarpur, 12.4.2007 kl. 11:39]

Öll erum við að kikna undan verðbólgu, vaxtaokri o.s.frv. Og þetta kallar þú konkret hluti. Allt í lagi.

Hinsvegar, fyrir þeim sem skilja samhengið á milli umhverfisins sem við búum í og lífsgæða, þá eru umhverfismál konkret mál. Ætli það sé tilviljun að umræðan um t.d. loftslagsmál séu nánast í hverjum einasta fréttaþætti allsstaðar? Afhverju ætli það sé?

Það eru mistök sem við lifum með í dag að hafa gengið á auðlindir lands og sjávar og skilið eftir okkur slóða rányrkju og mengunar. Því miður kostar það mikið fé að færa þetta í rétt horf. Ef við tökum ekki tillit til umhverfisins á öllum stigum, þá fer enn verr.

Ég er ekki sáttur við að kalla umræðuna um umhverfismál "náttúruverndarmaníu". Ber vott um skilningsleysi á háu stigi.

[Þorsteinn Gunnarsson, 12.4.2007 kl. 13:37]

Þetta er allt í lagi í bland við annað... en ef þú heldur að allir flokkar séu jafnsannfærðir og þeir láta í veðri vaka.. nú korteri  fyrir kosningar þá leyfi ég mér hreint og klárt að efast um það. Grænt er "inn" núna og þvi leggja margir flokkarnir slíka ofuráhersu á þann þátt nú. Það er bara ekki verið að kjósa þingmenn til að fylgjast með sprettu á Þjórsábökkum heldur til að stýra landinu  næstu fjögur árin. Og ég er bara, fyrirgefðu, einn þeirra sem telja að það sé margt hér á landi brýnna en umhverfismálin. Hér ganga geðfatlaðir húsnæðislausir um göturnar. Fólk bíður 250 daga eftir að komast í hjartaþræðingu, nokkur þúsund börn búa við fátækt, aldraðir búa ekki við áhyggjulaust ævikvöld... þú hóar bara í mig þegar þú vilt að ég hætti...

Þessi atriði eru í mínum huga miklu alvarlegri en hvort álverið stækkar eða hvort virkjað verður í neðri hluta Þjórsár, og eiga að vera  í forgangi.. en ekki í einhverju "þess má geta í framhjáhlaupi" horni í umræðunni. Og viljirðu kalla þessa skoðun mína skilningsleysi... ja.. þá er ég bara sáttur að skilja ekki.

[Skarpur, 12.4.2007 kl. 15:07]

Skil þig alveg og þessar skoðanir eiga rétt á sér.

Hinsvegar má segja að það sé vandamál umhverfismála að þau séu tekin út sérstaklega - eins og þau séu sérstakur málaflokkur, en það eru þau í rauninni ekki. Til þess að við getum lifað í þjóðfélagi sem virkar, verður að taka tillit til umhverfisins við allar ákvarðanir. Stórar jafnt sem smáar. Ég veit ekki hvað á að kalla það, en það er e.k. umhverfismenning, vitund, tilfinning sem alla jafna vantar í fólk. Og um það snýst barátta umhverfissinna. Það eru illa uppfræddir umhverfissinnar sem halda að umhverfismál fjalli t.d. bara um rusl eða bara um álver eða bara um loftslagsmál. Þetta snýst um að koma umhverfinu að, því við getum ekki skilið okkur frá því. Þetta er konkret í mínum huga. Og auðvitað vil ég að bróðir minn komist að í hjartaþræðingu sem fyrst...